Golf með Bödda Bergs

Haraldur Franklín Magnús er atvinnumaður í golfi frá 2016. Hann var sá fyrsti frá Íslandi í karlaflokki til að ná inná stórmót í golfi. Hann segir okkur frá mótinu og ferlinum í léttu spjalli. Einn þekktasti kylfingur landsins segir líka frá framtíðar plönum. Ekki mörg hlaðvörp um golf sem bjóða uppá Harald Franklín, Michael Cane og Kipling í einum þætti - en þessi gerir það.

Eva Kristinsdóttir er ein sú efnilegasta í golfi á Íslandi. Hún stundar nám og golf með Iowa háskólanum í USA og hefur farið frábærlega af stað á sínu fyrsta ári. Hún segir frá lífinu, golfinu og ýmsu öðru. Eva flækir ekki hluti um of og er einlæg og skemmtileg í þessu kollekt símtali frá Íslandi.

Helgi Birkir Þórisson fyrrverandi landsliðsmaður í golfi er með eina fallegustu sveiflu landsins. Hann var Íslandsmeistari í holukeppni 1999. Helgi segir frá upphafsárunum, ferlinum og hvað hann er að laga í dag. Helgi er ekki hættur og það glittir í gamla keppnismanninn í þessu lauflétta viðtali. Hann kemur víða við og svarar of stórum spurningum um golf og lífið.

Nökkvi Gunnarsson er þjálfari, PGA kennari, kylfuberi og kylfingur. Segir frá ferlinum og almennum pælingum hvað varðar sveifluna og golf. Hvernig er að vera þjálfari og kylfuberi hjá Íslandsmeistara kvenna í golfi Guðrúnu Brá Björgvinsdóttur. Nökkvi er ferskur og ætlar að vera með í 50+ golfinu.

Systurnar Ásdís og Nína Margrét Valtýsdætur komu í heimsókn. Þrátt fyrir ungan aldur hafa þær stundað golf í 14 ár, æft og keppt við þær bestu. Líkar en samt svo ólíkar að það er yndislegt. Þær voru 9 og 11 ára þegar þær byrjuðu í golfi og segja frá hvernig það var. Systurnar segja sína skoðun á æfingum og keppni og hvað er kannski hægt að bæta. Heilbrigt spjall við frábæra kylfinga og ungar konur þar sem neistinn fyrir lífinu er heldur betur til staðar.

Ólafur Þór Ágústsson framkvæmdastjóri Golfklúbbsins Keilis er gesturinn. Óli golf eins og hann var kallaður sem ungur drengur talar um gamla tíma og nýja. Hvernig Hraunið eða fyrri níu varð að veruleika og pælinguna bakvið breytingarnar á Hvaleyrinni. Ný verkefni og margt fleira. Ólafur er maður í fremstu víglínu í íslensku golfi og ástríðan leynir sér ekki.

Hólmar Freyr Christiansson vallarstjóri Korpu. Fór 8 ára uppá golfvöll og er enn ekki kominn heim. Hólmar segir frá uppvaxtarárum, náminu, starfinu og svarar spurningum frá kylfingum varðandi ástand vallar. Hin hliðin á peningnum er alltaf áhugaverð. Hérna komumst við að rót vandans í orðsins fyllstu.

Ragnar Ólafsson Íslandsmeistari 1981. Lifandi goðsögn í íslensku golfi. Sögur sagðar og ráð gefin. Viðtal sem allir kylfingar hafa vonandi gott og gaman af - ungir sem aldnir. Raggi var sjötugur 1. september því tilvalið að renna yfir ferilinn.

Jón Kristbjörn Jónsson. Jón er sjómaður og stundum kallaður Jón sjóari eða Jón góði. Hýreygur en með vott af eftirsjá, reglubundinn í andlitsfalli, krumlur sterkar og faðmur stór. Brúnt andlitið segir þér að þessi maður hefur séð hafið og horft í sól. Jón segir frá lífinu og golfi - einsog honum er einum lagið.