
Fréttir vikunnar | Sigur „fjölbreytileikans“ í Bandaríkjunum, Woke 2.0 og brottfararstöð í bið
Show notes
Af ýmsu er að taka á þessum fallega föstudegi. Demókratar unnu stórsigur í bandarísku þingkosningunum. Hver er með sína skýringu á því. Spilling er nefnd, lífskjarakrísan, efnahagsástandið og svo stríðið í Íran. En ef maður tekur mið af túlkun Samfylkingarinnar virðist þetta allt vera hálfgert aukaatriði. Stóra málið í þeirra augum: Fólkið valdi „fjölbreytileikann“ þar vestra. Við skyggnumst bak við slíkar yfirborðsklisjur og förum yfir raunverulegar ástæður þeirra pólitísku tíðinda sem urðu í Bandaríkjunum í vikunni.
Síðan er það brottfararstöðin, sem átti að vera stóra málið í útlendingamálum á síðasta þingi. Svona brottfararstöð hljómar ágætlega á blaði. Fólk á bara að geta verið þarna nokkra daga og vera svo sent úr landi. En þegar maður fer í brottfararstöðvar annars staðar í Evrópu fattar maður að veruleikinn er allt annar. Þar ílengist fólk mánuðum saman og milljarðakostnaður hleðst upp, sem væri mögulega sparaður með því að breyta grunnkerfinu í staðinn.
Nú er búið að fresta þessu sem var svona mikið þjóðþrifamál um heilt ár án þess að nokkur blikki auga. Hvað segir það um árangur ríkisstjórnarinnar í þessum mikilvægasta málaflokki okkar tíma? Ritstjórinn fer líka yfir tillögu Miðflokksins um bann við algerri hulningu andlits.
Að lokum er það söguhornið. Jón Ólafsson ritstjóri og alþingismaður vildi koma á fót íslenskri nýlendu í Alaska þar sem Íslendingar áttu að geta lifað sem íslensk þjóð, ríkari og fjölmennari en heimaþjóðin. Ritstjórinn les upp úr bók sem Jón skrifaði um þetta árið 1875 og rekur helstu röksemdir fyrir verkefninu sem aldrei varð að veruleika. Menn hafa oft og tíðum miklar vonir og væntingar um glæsta framtíð en veruleikinn er síðan allur annar. Það er kannski ákveðið þema í þessum þætti..